టీమిండియాలో రీఎంట్రీపై ఆశ ఎప్పుడూ వ‌దులుకోను: ష‌మీ

భారత జట్టు సీనియర్ పేస్ బౌలర్ మహ్మద్ షమీ, టీమిండియాలోకి పునరాగమనం చేయడంపై తనకున్న బలమైన ఆకాంక్షను మరోసారి వ్య‌క్త‌ప‌రిచాడు. ఇటీవల ప్రకటించిన న్యూజిలాండ్ పర్యటనకు ఎంపిక కానప్పటికీ, తాను ఏమాత్రం నిరాశ చెందలేదని, జాతీయ జట్టులో స్థానం కోసం తన ప్రయత్నాన్ని కొనసాగిస్తానని స్పష్టం చేశాడు. 

దాదాపు నాలుగేళ్ల తర్వాత తన సమకాలీనుడైన 36 ఏళ్ల భువనేశ్వర్ కుమార్ జట్టులోకి తిరిగి రాగా, 2025 మార్చి నుంచి టీమిండియాకు దూరంగా ఉన్న షమీకి మాత్రం చోటు దక్కలేదు. ఈ నేపథ్యంలో షమీని తిరిగి జట్టులోకి తీసుకోవాలనే డిమాండ్లు పెరుగుతున్న తరుణంలో అత‌డు చేసిన వ్యాఖ్యలు ప్రాధాన్యత సంతరించుకున్నాయి.

బెంగాల్ తరఫున రంజీ ట్రోఫీలో సర్వీసెస్‌పై విజయం సాధించిన అనంతరం షమీ మీడియాతో మాట్లాడాడు. తన ఫిట్‌నెస్ గురించి ఓ విలేకరి అడిగిన ప్రశ్నకు తనదైన శైలిలో బదులిచ్చాడు. "సార్.. నేను ఇప్పటికీ నా ఫిట్‌నెస్‌లో అత్యున్నత స్థాయి (పీక్)లోనే ఉన్నాను. ఇందులో అబద్ధం చెప్పాల్సిన అవసరం లేదు. నేను ఎలా ఉన్నానో, అదే నా పీక్ ఫామ్" అని ధీమాగా చెప్పాడు. 

దేశవాళీ క్రికెట్ ఆడటాన్ని తాను ఎంతగానో ఆస్వాదిస్తానని, భారత జట్టులోకి పునరాగమనం చేయాలనే లక్ష్యాన్ని వదులుకోవాల్సిన అవసరం లేదని అన్నాడు. "ఏ క్రీడలోనైనా, ఏ వృత్తిలోనైనా ఒక లక్ష్యం ఉండాలి. టీమిండియాలోకి తిరిగి రావాలనే ఆశ ఎప్పుడూ ఉంటుంది" అని పేర్కొన్నాడు.

న్యూజిలాండ్ పర్యటనకు ఎంపిక కాకపోవడంపై అడగ్గా.. "ఇందులో నిరాశ చెందడానికి ఏమీ లేదు. గతేడాది కూడా దేశవాళీ సీజన్ మొత్తం ఆడాను. నా లక్ష్యం ఒక్కటే, వీలైనన్ని ఎక్కువ మ్యాచ్‌లు ఆడి రాబోయే సిరీస్‌లకు, టోర్నమెంట్లకు సిద్ధంగా ఉండాలి. ఎప్పుడు, ఎక్కడ టీమిండియాకు ఆడాల్సి వస్తుందో ఎవరికీ తెలియదు కదా. దేశవాళీ క్రికెట్ ఆడటం నా లయను కాపాడుకోవడానికి ఎంతగానో ఉపయోగపడుతుంది" అని వివరించాడు.

గత ఏడాది కాలంగా సెలక్టర్లతో ఏమైనా మాట్లాడారా అని ప్రశ్నించగా.. "సార్.. నేను భారత జట్టులో లేను కదా. నాతో ఎవరు మాట్లాడతారు? అసలు నాతో ఎందుకు మాట్లాడతారు?" అని షమీ సూటిగా బదులిచ్చాడు. అదే సమయంలో భువనేశ్వర్ కుమార్ పునరాగమనాన్ని ప్రశంసించిన షమీ, అతని ఫామ్‌కు ఎప్పుడో అవకాశం వచ్చి ఉండాల్సిందని అభిప్రాయపడ్డాడు.

తనకు పేరు ప్రఖ్యాతులు తెచ్చిపెట్టింది బెంగాల్ జట్టేనని, తన కెరీర్‌ను కూడా ఆ జట్టుతోనే ముగిస్తానని షమీ స్పష్టం చేశాడు. "ఆడిన జట్టు పట్ల విధేయత, అంకితభావం చాలా ముఖ్యం. మిగతా విషయాలు మన చేతుల్లో ఉండవు" అని తెలిపాడు. వచ్చే ఏడాది దక్షిణాఫ్రికాలో జరిగే వన్డే ప్రపంచకప్ గురించి ఇప్పుడే ఆలోచించడం లేదని, అందుబాటులో ఉన్న మ్యాచ్‌లు ఆడుతూ నైపుణ్యాలను మెరుగుపరుచుకోవడంపైనే తన దృష్టి ఉంటుందని షమీ చెప్పుకొచ్చాడు.